Global Chin News

Monday, Jul 28th

Last update07:28:05 PM GMT

Phungki Wirathu: TIME Reporter Nih Bia A Ṭawncop

alt
Muslim huatu tiah timi phungki Wirathu nih TIME reporter Hannah Beech, bia in a tuk; media phungkel a buar i, TIME Mekazin capar “The Face of Buddhist Terror” in kahnak ṭihnung a ser, a ti.

Mah hi Asian Pacific TIME Mekazin capar, Kawlram ah atu lio i, chuahzuar khapmi nih Muslim dohnak a chuahtertu timi (Wirathu rian ṭuannak) ‘969’ thazaang kong, a dikthlir in a ṭial.

Nizan Cawnnithum ni ah, Wiranthu i cakuat thup lo (open letter), zapi rel awkin chuah a si i, Wirathu nih Beech le a hmanthlatu kha dawhriate in ka rak chawnhbiak hna; nain, khuaihliti in khuhmi namte bantuk, (Beech) bia thlumthlum hi hlennak a si lai ka rak hmu kho lo tiah a chim.

Nitlaklei media hi ka rak zohsang hna, nain, TIME reporter nih remdaihnak kai tinhmi kong, holhlet ai palh tiah a ti. Wirathu nih Beech he bia an i ruah lio i a chimmi, ca in a chuah i, ‘huatnak phungchim’ timi hi (Beech nih) a ṭawncop a si tiah a ti.


Hannah Beech hi TIME's East Asia Correspondent le China Bureau Chief a si. Kawlram Cyclone Nargis thilchia kong kha, kum 2009 ah cauk in chuahpiak a si hnu ah thawng laak thiam man ah SOPA Award pekmi a si. Atu thla thokka ah 969 thazaang thawngla awkin Kawlram ah a rak lut tiah Mizzima nih a ṭial.

“Nazi Lungkawng pa, Neo Nazi le Burmese Bin Laden min hi Muslim nih Facebook ah an ka sakmi min a si tiah [Beech kha] ka chimh. Cun, Media zalenmi nih ‘Burmese Bin Laden’ timi min kha an hman ngam” tiah Wirathu nih cakuat ah cun, a ti.

Kai tinhmi hi ‘minung thisen luatter’ a si lo, a ti; asinain, 969 thazaang cu Muslim dohnak a chuahpitu a si tiah sualphawt a si.

969 thazaang nih a forhmi hna ah, Muslim dawr ah Buddhist nih thil cawk lo ding, ti a si. Wirathu nih mah hihi, Muslim thlaknak ah si loin, Buddhist humzualnak ca tu ah a si tiah a ti.

Lashio i Muslim biakinn, sianginn le dawr khangh lio ah, 969 cakhenh hi kakip ah rak phozar a si. Cu kongah, mawhchiat khawh ka si lo, zeicatiah, cakhenh kha tukdennak ah hmang hlah u ka ti hna tiah Wirathu nih a ti.

Cuticu a ti nain, a phungchimmi cu video le aukhumhnak seh ah khumh an si i, atu ah ramchung ah zamh cuahmah lio a si – naitan buainak vialte a chuahpitu tiah sualphawt a si.

“Ka phungchim hi na chim bantuk a si lo, huatnak in a kaangmi a si lo” tiah Wirathu nih Beech sinah cakuat cungin a ti.  


Older news items:

Laica Kong

Interview Biahalnak

Minthang Thawng

Contact Us

Mailing Address
GLOBAL CHIN
MEDIA GROUP

215 Sand Beach Bvld,
Apt 107

Shreveport, LA 71105
USA

globalchinnews@gmail.com
_________________

Global Chin News is a non-profit news agency