Global Chin News

Thursday, Sep 18th

Last update01:01:38 PM GMT

Malaysia Ah Phaipha Khuami, Mawtaw Pah In A Thi

  • PDF
alt

Kuala Lumpur (GCN) -  Pu Peng Zung Sang, kum 20 hrawng, Hakha peng Phaipha khuami nih Malaysia, Kuala Lumpur (KL) khua i Imbi le Pudu kar highway ah mawtaw  khawnden a tuar i, mual ah a liam. Mahtihin mawtaw pah a ton hi November 11, 2012 ni zanlei  suimilam 5 hrawng ah a si. A nupi, kum 20 hrawng simi, nau a pawi liomi he Imbi le Pudu kar lam an tan cuahmah lio ah mawtaw nih Pu Peng Zung Sang cu a pah. Cuka hrawng cu Chinmi lam kal chukcho an umpah lengmang i, a pah tlawmpal ah Chinmi  nih an hmuh hna i ambulance an auhpiak hna.

"Taxi in kan kal i, an pa cu lam kam ah a rak ril ko. A nupi cu fapawi liomi a si i, ngaihchia ngai in a rak dir ko lio kan va hmuh i, zokzok in kan ttum i kan va zoh  tikah, an pa cu mawtaw nih a rak pah bia a rak si. Ambulance kan auhpiak zok hna i UKM si-inn lei ah an kalpi" tiah Nu Par nih GCN thawng hlattu sin ah a kan chimh.

GCN nih kan hlatchap; sii-inn a phak hnu tlawmpal ah a nunnak a dih cang tiah  sii-inn nawlngeitu nih a chungkhatle sinah an rak chimh hna. Cuticun, KL khua ummi Senthang Fellowship nih thaizing ah a ruakvui  nakding  an timhlamh. Sahlawh rualchan cingla le  ruak thlah a duhmi dihlak nih Senthang Fellowship hmun, Sungkaibisi ah i ton hmasa a si lai; Rawang thlanmuallei ah vui asi lai tiah GCN nih thawngpang kan theih khawh rihmi vial a si.

Peng Zung Sang hi Imbi ah a ummi a si. Pu Sang hringtu nu zong cu, cu tin khawndenak ah cun a um ve, a mah zong cu Kawlram in a phanthar a si. Hiti mawtaw khawnden a can hi a innchungnu he, a nu he tiin Pudu lei len an kal lio ah si dawh a si. Pu Sang a thihnak hmun ah hin  a dang Chinmi tam ialte, mawtaw nih a rak pah bal cang hna. ACR nih bochan mi upapakhat rak simi Pu Tluang Hei zong mah ka khan mawtaw nih a rak pah i a nunnak a rak liam.

"Malaysia ah a ummi Laimi ralzam pawl hi mawtaw nih a kan pah, mithalo nih an kan velh. Ui tuah le ar tuah in tuah kan ing i, lung a faak tuk. Mawtaw in an pah hna tikah a pahtu nih an zam tak hna i, minung ah an kan rel lo. Ramdang kal ding cu chim hlah, UN hmuh le a si kho lo dingmi dirhmun ah kan um cang. Malaysia um Chin ralzam pawl kan nunning hi ngaihchia tuk kan si. Aho tal a kan chanh khotu an um hnga maw?" tiah Chin nutung pakhat nih GCN sin ah ngaihchia ngai in, mithli he a chim.

"Mahka zawn ah khan lam tan lo ding tiah  Malaysia Chin  chuahmi cazual tampi nih  ralrinnak ca an chuah lengmang ko nain, mi tampi nih mahka zawn cun, lam an tannak in an nunnak a liam cang. Lam phungzulh, kan zulh duh lomi hi kan poi ngainak  a si ve. Thih le loh cu vanchiat ton a si, Pathian nawl a si ko. Sihmanhsehlaw, kanmah Chinmi hrimhrim nih kan i ralring deuh dingin fim a kan chimh ko tiah ka ruah. Mahka zawn ah hin mithalo zong nih Chinmi an bawh lengmang hna i, naam in an chunh hna, an velh lengmang hna" tiah Malaysia um Chin community upa pakhat nih GCN sin ah siaherhnak he a chim.

Laica Kong

Interview Biahalnak

Minthang Thawng

Contact Us

Mailing Address
GLOBAL CHIN
MEDIA GROUP

215 Sand Beach Bvld,
Apt 107

Shreveport, LA 71105
USA

globalchinnews@gmail.com
_________________

Global Chin News is a non-profit news agency