Global Chin News

Thursday, Apr 17th

Last update09:22:05 PM GMT

Sung Tin Par Nih Kawl Hla Thar Aa Chuah

alt

Kawlram hlasak thiam minthang Lainu Sung Tin Par nih Kawl hla in hlaphel thar "A Tit" (a thar tinak) aa chuah.  A hlaphel thar media sin theihternak cu Dec. 12, 2012—Park Royal hotel, Yangon ah an tuah.  Hi a hlaphel hi a chuahpiaktu cu Forever Blossom (MRTV 4) an si.  December 22 ah CD in an zuar lai.  VCD le DVD tu cu 2013 kum ah chuah le zuar a si te lai.  A hla zuarnak tuanvo a latu ding cu The Sun Music Production an si lai i phel khat ah K 2000 kan zuar lai an ti.

An hlaphel hi Kawlram ah a um bal rih lomi Gold Disc timi in an tuah.  Gold Disc in tuahnak hi Kawlram ah a um rih lo caah Bangkok ah an tuah.  Gold Disc hi Disc dang nakin a quality a tha deuh ngai ti a si.

Atu hrawng Kawlram cu hlaphel asiah Video a siah a chuah le cangka phungning loin an tlen (copy) ciammam i a chuahtu nih an zuar hlan ah lam kam ah man fawi taktak in cawk ding khat tung a um lengmang.  Cucaah, a chuahtu pawl hi an sungh lengmang caah hlachuah hi an i harh ngai, an tih, an zenh cio.  Sung Tin Par zong hi hlaphel thar aa chuah lonak kum 7 a si cang.  " Ka hawikom (Laimi deuh) nih hla an phuahmi tete kha sa law i chuah kho tiin tha an ka pek tawn, cuti ka hawile thapeknak le bawmhnak thawngin atu hlaphel kan ser khawh hi a si i, a hlei in a ka chuahpiaktu Forever Blossom cungah kaa lawm hringhran tiah" a hlaphel introduce tuahnak ah Sungtin nih a chim.  A hla tialtu hi panga an si i Laimi pathum an i tel.

Atu bantukin mirum le mithiam tampi nih hlaphel an i chuah ngam lo lio, an i chuah khawh lo lioah, kan Lainu pakhat nih raltha ngai in hlaphel thar a chuah khawhmi hi lawmhpi a um ngaingai.  

A hlan ah cun, Kawl nih hin Par ti hi an chim kho lo i Paa asiloah Paal tiphun in a aw an chuah.  Sung Tin Par thawng in 'Par" tiah an chuah khawh.  Cucaah, Sung Tin Par thawngin Laimi kan Par kho cang.  

Attach file in a hlaphel phaw ka von thil chih.

Joel Ling
Ygn

Laica Kong

Interview Biahalnak

Minthang Thawng

Contact Us

Mailing Address
GLOBAL CHIN
MEDIA GROUP

215 Sand Beach Bvld,
Apt 107

Shreveport, LA 71105
USA

globalchinnews@gmail.com
_________________

Global Chin News is a non-profit news agency