Global Chin News

Tuesday, Oct 21st

Last update07:16:56 PM GMT

Personal Computer: PC Hardware & Software Kan Ti Lengmangmi Hi

alt

Biahramdomh : Kawlram ka um lio kum 2004 ah Computer Basic Course hi tthate in ka rak cawng cang i Email, Internet le a herhmi dangdang hi ka rak tuaitam khawh pah ve cang. Kum 2007 Delhi ka rak phak a thaizing ah kan u pa pakhat sin ah an ka len pi. Ka kut a ka tlaih. Zeitidah na rak rat ve? tiah biahalnak a rak ka tuah.

 

Ka timi cu Kawlram lei ah cun Innkaba i Ngengpiki tar bang i tar ve ding ah Sianginn kai cu ka lim phot ve. Asinain Kawlram education cu na theih bang a si ko i, ka lei hin University hna peh chap, cun computer zong cawn pah ka duh tiah ka leh. Computer cu Hardware maw na cawn lai Software dah tiah biahalnak a ka tuah tthan. A ruah awk ka thei ve ti lo. Computer ka cawng lai tiah ka leh tthan. A thinlung chung ah ka lehnak bia nih zeitin rian a ttuan cu ka thei ve lo.

Chim duhmi cu computer, computer kan ti lengmangmi hi zeidah a si i, Hardware cu teh a zeite khi thla a si i, Software zong cu teh a zeite cu dah a si. Zeitindah an rianttuanning ti pawl kha a thei ve rih lomi caah tthathnem santlai a si hmanh maw tiah ka Hand-Note nan sin ah ka rak ttial. A ca in a fian khawh chung in fianter kaa zuam lai i Figure/ (Chart) zong hin tthate in rak zoh chih te u law a tliang chinchin lai.

Computer tuanbia kan ttial ah cun, biatlang dangpi si lai caah cabia dang in kan ttial tthan te lai. Tu cu zapi theihmi Personal Computer chungum tlawmpal theihtlei tete khi ttial duh chan bikmi cu a si.

Computer : Computer timi biafang nihihn electronic in tuahmi thil tampi a huap caah, computer phun tamtuk a um. Nihin ah cun telephone hmanmi pawl Smart Phone pawl hmanh computer rianttuannak lawngte an si cang caah, zeiset khi computer ti khawh a si ti lo. Nain, zapi theih khawh ding caah, zapi hmanmi Personal Computer(PC) pawl simi Desktop computer si lo le labtop kha  mah hi cabia ah hin 'computer' tiah a sawh duhmi cu a si.

Computer rianttuanning le sining hi a tlangpi in phun hnih ah tthan a si i, I) Hardware le II) Software ti a si. Hi pahnih chungah hin tampi thil dangdang a um rih. Tutan ah kan ttial dih kho cawk lai lo. Cun ttial dih khawh zong a har ngai lai. Cucaah a tlangpi in kan i fiannak ding ah ka vun langhter lai.

Software:

Software hin 1) Operating System (OS) le 2) Application Software tiah phun hnih in tthen tthan a si.

1)    System Software or Operating System: System Software si lole Operting System (OS) kan timi cu kan theih lengmangmi Windows kha a si. Operting System cu a fawinak in kan chim a si ah cun Computer a nuntertu ti zong in ti khawh a si. Hi OS ah hin, Microsoft nih chuah mi Windows OS, Apple company nih chuahmi Mac OS, cu hnu ah chuakmi Android OS, Linux OS, tiin phun tampi a um.  Zeimawzat cu Figure ah ka hun langhter. OS i a rianttuaning kha tlawmpal in fianternak kan tuah lai. Computer cu amahte in rian a ttuan khomi a si ve lo. Kan theih fian deuhnak hnga caah Pathian nih minung a ser lio in tahchunnak kan lak a si ah cun Minung cu tlak in a kan ser i, a kan ser dihka ah cun vawilei menmen kan si. Kan nun khawh nakhnga ding caah nunnak thaw a kan pek. Computer zong cu an ser dih hnu ah a chungah OS kan timi kan chiah kan khumhpiak hnu lawnglawng ah hman khawh a si ve. Computer nunternak ding caah electric energy a hau timi cu zapi theih a si ko caah ka fainter ti lai lo.

Zapi zaran deuhnih computer ai rawk dih kan ti tawn mi khi ngaite tiah cun, Operating System OS ai rawhmi deuh a tam i, OS cu a thar in vun khumh tthan le vun remh tthan ah khin a ttha cawlh khomi khi a si. Virus ruang ah a rawk kho tawn i, cun a dangdang ruang zong ah a rawk khomi a si. Asinain, computer rawh taktak khi cu a si lem lo. Mei nih a kangh, thil nih a nenh, accid ummi ti nih Motherbaord a tlak tbtk dah ti lo cu, computer i rawh taktak hi a fawi lo.

2)    Application Software : Application Software kan timi cu Computer in rianttuannak ti zong in ti khawh a si. Hlan chan Application Software a chuah hlan hin Windows nih aa rak kenmi Windows Paint, Windows Notepad le Windows Wordpad ti pawl hin rian tamlakte an rak ttuan. Sihmanhsehlaw atu kan nih chan ah cun fawite in rianttuan khawhnak ding caah, rian kan ttuan duhmi ning hoih in Software an serchuah thluahmah cang. A theih hmanh theih cawk ding le cawn cawk ding zong a si ti lo. Application Software cu rianttuannak hriamnam pakhat ti zong in auh khawh a si. Lo vah kan duh tikah Namtong le Hretlung kan i khen. Lo thlawh kan duh tikah Tuhmui kan i ken. Facang ah kan duh tikah Dattari kan i ken. Thingphurh kan duh tikah Sei kan i phurh bantuk khin Computer zong cu, cucu khakha tuah kan duh tikah ah mah Software, cu Software cu kan hman ti khin a kalning cu a si ve. A sau tuk lai caah pakhat pahnih te lawng kan fianter lai. Ca ttial kan duh tikah Microsoft Office Word kan hmang. Graphic design tuah kan duh tikah Corel Draw, Adobe Indesign tbtk.. kan hmang. Hmathlak sersiam (Edit) kan duh tikah Adobe Photoshop kan hmang. Software pawl zong kanmah nih kan hman deuhmi pawl Figure ah ka rak langhter chih bang.

Hardware

Zapi hmanmi computer pawl i Hardware zong hin a biapi bik mi thil pawl hna cu;-

1) Monitor,  2) Central Processing Unit (CPU), 3) Memmory or Random Access Memory, 4) Hardisk, 5) Motherboard, cun 6) mah cu thilripawl a tuam tu Casing, cun Keyboard, le Mouse  hna hi an si.

1)  Monitor: Mah hi PC computer ah biapi bikmi thil cu a si lo. Monitor lo in computer pakhat rian tlamtling in a ttuan kho. Monitor nih a tuah bikmi cu 'Display' timi mui a cuantertu lawng khi a si. Amah lo hin tlamtling taktak kho ve lo. CRT monitor le LCD tiin phunhnih a um i, LCD kan timi cu a phengmi pawl khi si. Tuchan ah cun Monitor ah hin computer thilri pawl ai peh dihmi 'All-in-One' PC pawl zong hman len si cang.

2) Motherboard: Computer rianttuannak ding caah Electric circuit kal a herh i, cu electric circuit nih cun 'chips' timi computer rianttuannak tengnge tete hna le, hard disk, CPU, memory le electric power luhnak hna kha a peh tlaihter dih. Motherboard cungah hin Network ai bunhnak kua 'ports', speaker luhchuahnak, cun a dang USB tbk pehnak tibantuk hna zong an um chih. Graphic Card timi hi monitor cung ah zuk a cuantertu a si i, cu zong cu Motherboard cung ah a um theo. Motherboard ah ai bunh chihmi cu 'Buildin' tiah auh a si. Motherboard ah ai bunhmi leng khin 'Graphic Card VGA' pawl zong cawk in bunh chap khawh zong cu a si ve. Network pehnak zong cu, Motherboard ah buildin a um bantuk in cawk i 'Network Card' bunh chap khawh cu si ve. Wireless pehnak caah hin cheukhat motherboard cu Wifi ready buildin a um nain, a tam u cu ai tel chih lai lo.

3) CPU(Central Processing Units): Computer thazaang tthawn le tthawn lo cu CPU thazaang hi zoh a si lengmang theo. CPU thazaang hi a rang le fum tahnak 'speed' GHz (Gigahaz) in tah a si. Intel company nih chuahmi CPU pawl hi zapi theih ngaimi an si. Biana ah 2.0 GHz tbtk khin a langhter. Hnubik a chuakmi speed a rang bik tiah theihmi cu AMD nih chuahmi Bulldozer based FX chips an si i 'clock speed' timi 8.429GHz a rang(Marco Chiappetta (2011)). Nain, zapi hmanmi pawl ah hin cun a rang deuhmi pawl cu 2.8GHz pahnih kemhmi pawl hi a si deuh. Computer pakhat CPU thazaang zoh in a man zong hi a fak deuh lengmang.

Computer pakhat CPU speed zoh ding ah > Windows Key + Pause/Break kha hmeh ti ah cun CPU thazaang fawite in zoh khawh colh a si.

Mah hi CPU cu Motherboard cungah benh si i, a cung in a linh tuk lo dingah a khamtu thilri pangka or a dang daihternak thilri hna he bunh chih lengmang si.

Mi cheu nih computer tanglei seh casingin  aum mi khi CPU tiah an auh tawn i, cu cu a dik lo mi auh ning a si. CPU timi cu Processor bak lawng kha a chim duhmi a si, 1 square inch hrawng lawng a si. Motherboard cung ah ai benhmi te a si.

4) Random Access Memory: RAM si lo ah Memmory tiah zapi nih theihmi hi Computer pakhat ah CPU bantuk in umlo si kho lomi si ve. Memory thazaang relning cu MB, le GB Migabytes le Gigabytes in rel a si. 64MB, 128 MB, 254MB, 521MB, 1GB, 2GB, 4 GB, 6 GB, 8 GB tiin Memmory thazaang cu rel a si.  Tuchan ah cun 2GB in cunglei hi hman si dih nawn cang. RAM hi pa hnih thum Motherboard cung ah bunh awk ah a ttha, sawhnak hmun 'Slot' a tlum paoh ah cun chap khawh si. Computer cawk ka ah 1GB RAM si seh law, RAM thar 1GB cawk chap i, chap khawh a si.

RAM thazaang check ning le CPU thazaang check ningcang cu ai khat.

5). Hard Disk or Hard Drive : Computer pakhat ah Hard disk, RAM le CPU hna hi computer pakhat thazaang tlawm le tam, man a khiak tubik cu an si. Hard Disk cu thilri chiahnak 'storage' a si bantuk in, hmasa kan chimmi seh rianttuantertu Operating System a umnak hmun cu a si. Cun, ca maw, hmanthlak maw video hna maw kan 'Save' i kan i chiahnak hmuh khi Hard Drive chung ah kan chiahmi a si. Innkhan bantuk a si. Phun dang in kan chim a si ah cun rawlkhonnak pawpi ti zong in Lai holh in auh ah cun aa rem ngai.

Hard Disk Thazaang check ding caah 'Computer' or 'My Computer' timi kha double click hmeh i, Local Disk (C:) Local Disk (D:) tbk pawl hmuhmi kha vuikhat hmeh ah cun, hmuh khawh si. HDD hard disk thazaang cu memory thazaang he khan a rel ning ai lo pah - Gigabytes deuh hman si cang. Tuchan ah cun 1Terabytes TB timi Gigabytes 1024  ummi Hard disk hman khawh a si cang.

6). Dangdang: Keyboard cu cattialnak si, Mouse cu sawhnak si, mah hi cu tampi kan ttial ti lai lo. Speaker hi cheukhat computer ah Monitor ah a um cia. A dang caah Speaker bunh chap a hau.

Kan biatlang bantuk in biafunnak tawite kan tuah a si ah cun Software kan timi cu a hmannak a si i, Hardware kan timi cu a seh thilri a remh lei pang le control ning cang kha chim duhmi a si. Figure i kan laktermi khi a tlangpi in an si. Khi pin ah tamtuk a um rih. Cun Application Software pawl hna ah khin Version in tam lak te tthen rih a si. Kan nih hna zong nih hihi a tlangpi in kan theih ve hrimhrim a herh tiah ka ruah caah a tawinak te in ka hung ttial.

Chirhchan

1. Kanellos, Michael (30 June 2002). "personal computers: More than 1 billion served". cnet news. Retrieved 2010-10-14
2. Chiappetta, Marco (23 September 2011). "AMD Breaks 8GHz Overclock with Upcoming FX Processor, Sets World Record". HotHardware. Retrieved 2012-04-28.
3. Wdc.custhelp.com. 29 March 2012. Retrieved 26 April 2012.
4. Searchstorage.techtarget.com (2011-06-13). Retrieved on 2011-06-18.
5. Wikipedia: "Personal Computer"
6. Encyclopedia, "Personal Computer"

Laica Kong

Interview Biahalnak

Minthang Thawng

Contact Us

Mailing Address
GLOBAL CHIN
MEDIA GROUP

215 Sand Beach Bvld,
Apt 107

Shreveport, LA 71105
USA

globalchinnews@gmail.com
_________________

Global Chin News is a non-profit news agency