Global Chin News

Thursday, Jul 31st

Last update07:40:49 PM GMT

Pulpit Cungah Mi Kip Nih Phung An Chimmi Hi A Tha Maw?

alt

Lairam Khrihfabu a siah ram leng chuak Laimi Khrihfabu an siah tam deuh nih cun Pulpit cungah a mi kip in Thawng Tha chim onh an si. Khriahfabu chungah rianttuantu a simi he a si lomi he zalong tein Thawng Tha an chim. Zalong tein Pulpit cungah mi kip in Thawng Tha chimnak kan onmi hi a ttha maw ttha lo ruah tti ding in kan sawm hna.

Hi ca na rel tikah hi ca hi a tthatnak mit in fak piin zoh khawh le tuak khawh naa zuam lai i a chiatnak mit zong in na tuak chih fawn lai. Cuticun zeidah ka dirpi ah a ttha lai timi cu nangmah tein a phi naa chuah ve lai i comment peknak kuat ah ahohmanh hnursuan loin na hmuhning kha fiangte le tawite in na langhter lai. Hi ca nan rel tikah catialtu lungthin/ruahnak nan pur-dap fawn lai lo. Catialtu nih cun a ttha a timi poah kha a dirpi ko lai. Naa hrawm khawh le khawh lo ah khan na buai lai lo i na hmuhning te kha langhter ding in sawm na si.

Hi Capar ka tial duhnak cu mipi le Khrihfabu buaiter duh ruang le midang dohelnak caah a si lo. Laimi hi kan Khrihfa sinak zoh tikah Khrih nun kan ngeih khawh lomi hi ka ruat ngaingai. Khrih nun a kan ngeihter kho lotu hi thil pahnih an si tiah ka hmuh:

1) Pastor te kan hmanmi hna hi vawlei leiin cawnnak an ngeih lo pin ah, Bible cawnnak a ngei lo, Diploma le B. Th hrawnghrang an tam tuk. Cu tikah an ruahnak, hmuhning le theihmi a tlawm pin ah, Bible an thei kho ti lo i an hrilhfiah kho ti lo. Khrihfabu a paw an cawm kho ti lo. Ti le rawl ttha an pe kho ti hna lo, member pawl an paw khim ti lo, rawl ttam in an um cang. Zumhnak a ngandam ti lo. Zumtu nih ruahchannak an ngei kho ti lo. An tthangcho kho ti lo. Rawhralnak nih a tei cang hna.

Innchungkhar khi an pa bik nih ti le rawl ttha pek loin um lengmang she law ngandamnak an ngei kho lai lo, an der lai, an zaw lai, an riangvai lai i hawi an tluk kho lai lo. An pa nih ti le rawl tthattha pe hna she law an ngandam lai i an tthawng lai. Cu bantuk in Pathian Bia hi tthate le hmaan tein phuan khawh hi Khrihfabu caah ti le rawl ttha bik a si.

Bible rel le caan pek in timhtuahnak ngei lem loin Thiang Thlarau aa bochan in phungchimmi le Pastor an tam tuk. Hihi a hmaan bak lomi a si. Bible leiah cawnnak ttha a ngeimi pa/nu nih cun timhnak ngei lem loin phung a chim kho ko lai, cawnnak ttha a ngei lomi pa/nu nih timhnak ngei loin phung ka chim kho ko a ti ahcun amah le mah mual a phoh bantuk a si lai. Cu bantuk minung nih cun a Khrihfabu cu sersiam le tthanchoter loin phungmen Khrihfabu ah a can/chuahter dih hna lai. Atu ah cun Bible cawnnak hi a herh tuk. Cawn sawhsawh zong a za hrimhrim lo. Thiam le theih hrimhrim a hau. Khrihfabu kan ngandamnak ding ahcun Bible cawnnak tthattha ngeih a hau ko. Tthanchonak a kan petu cu hi cawnnak hi a si. Khamhnak a kan petu cu cawnnak hi a si ko ti ve lo. Khamhnak cu kan ngei cio ve men ko hna lai, asinain cawnnak ttha a ngei lomi le theihnak a ngei lomi nih a kan cawnpiak lengmang ahcun khamhnak a hmu cangmi zong kan Thlarau nunnak ah kan zaw tthiamtthiam ko. Cawnnak ttha ngei lo le theihnak ngei lo nih cun lam ding le lam ttha cu a kan zulhter thiam/kho fawm lo cu teh! Khamhnak cu kan zumhnak thawng in a si ko caah khamhnak a ngei cang dihmi lawngte zong kan si kho men ko, a si zong kan si lo kho men ko, asinain kan tthanchonak ding cu hruaitu ttha an si ko. Tthanchonak petu hna cu cathiam, mifim, khuaruat kho le theihhngalhnak a ngeimi an si ko. Phungmen degree keng cu hruaitu ttha cu an si kho hnga maw?

Cun Bible nakin Thiang Thlarau aa bochan deuhmi kan tam tuk i kan palhnak a si fawn rua ka ti. Thiang Thlarau rianttuannak cu kan herh tuk i a biapi tukmi a si, asinain Bible hi hmaan te le biatak in kan phuan lo ahcun Thiang Thlarau rianttuannak kan hmu fawn lai lo. Mah ruahnak menmen le hmuhning menmen phungchim a ngah lo. Bible hi Pathian nih minung kut cungah a chiahmi hi fak piin ruat cang hna u sih! Pathian nih Bible hi a herh a ti caah minung kut ah a chiah i a lohtlau lonak ding tiang in a rungvengtu cu Amah Pathian tthiamtthiam a si ti hi philh hlah u sih. Zeitindah Pathian nih Bible hi tlau lo ding in a runven timi kong kan theih lo hmanh ah atu thok in Bible hi tlau lo ding in Pathian nih a rak runven timi tuanbia (Histoy) hi Khirhfa nih kan ngei timi theih hna u sih! Cucaah Bible hi Pathian nih Ka Khrihfabu nih an herh cang timi a theih caah a kan pekmi a si. “Pathian cakuat a si.”

Pentecost ah Thiang Thlarau cu aa phuang i tthawng taktak in zumtu/zulhtu hna rianttuannak cungah aa phuang i Khrihfabu aa dirh. Khrihfabu aa dirh kaa a si caah Pathian nih a Thiang Thlarau cu langsar khun in a hmanmi kan hmuh. Kha lio ah Bible a um rih lo, Biakam Hlun zeimawzat lawng an rak ngei i mi kip hmanh nih an rak ngei lo. Asinain Thaing Thlarau cu zultu hna le zumtu hna Thawng Tha chimnak hmun kip ah rian a ttuan i doh awk ttha loin Khrihfabu an karh i an tthawng. Khirhfabu aa dirh kaa a si tikah dohtu an tam i an tthawng, mah caah Thiang Thlarau kha full in aa hmang. Asinain caan zeimawzat a vun roh tik, zultu an thih dih hnu i Biakam Thar an vun ttial dih hrawng in cun Thiang Thlarau rianttuannak a tlawm chin lengmang. Biakam Thar aa ttial dih hnu cun Khrihfami Tuanbia kan rel le zoh tikah zeimaw caan tete lawngah Thiang Thlarau rianttuannak kan hmuh khawh cang. Bible kha Pathian nih biatak tein a hman cang. Bible kha hmaan te le biatak tein aa phuannak ah khan Thiang Thlarau rianttiannak kakip ah kan van hmuh tthan cang. Cuticun Pathian nih vawleicung ah a rianttuannak hi a thlen lengmang ve. Kan chim duhmi cu atu kan chan ah Pathian nih Bible hi a kan pekmi a si i Bible biatak aa phuannak cungah Thiang Thlarau aa phuang ve lai. Bible hi hmaan te le biataknak he aa phuan lonak hmun ah cun Pathian nih rian a ttuan hrimhrim lai lo ti ka zumh.
Cucaah Lairam ah Pastor kan hmanmi hna hi Bible cawnnak tthattha a ngeimi si hna seh law kan Khrihfa nun hi aa sersiam lai i a dam ko lai tiah ka zumh.

2) Laimi cu zalong tein Pulpit ah Thawng Tha kan chim dih kho hna i, hihi a tthatnak zong a um i a chiatnak zong a um. Mi kip in Pulpit ah Thawgn Tha kan chimmi hi kan Khrihfa nun a zawttertu a si rua ka ti fawn.

a) Pulpit cungah mi kip nih Thawng Tha chim a tthatlonak: Khrihfami cu tlangbawi lawngte kan si i Thawng Tha chimnak nawl kan ngei dih kan ti. A hman ko! Pulpit cungah Thawng Tha kan chim cio tikah thazaang kan laknak a si ve kan ti. Bible kan rel deuh ve i a kan tthathnem ngai kan ti. Kan hmuhning le kan ruahnak kan chim kho ve, kan i cawngia kho ve, kan lungthin chung ummi kan chim kho ve i chimtu caah cun a tthatnak tampi a um ko. Asinain Pathian nih kan Khrifabu thluachuahnak kan pe she ti kan duh ahcun mi kip nih Pulpit an kai lo ah a ttha zeicatiah: zudin buin Pulpit a kaimi an tam, thurhnawm buin an kai, Pulpit cungah entainak bia an chim, mah duhmi chimnak an hman, thangchiatnak bia an chim, soiselnak bia an chim, Biatak an phuang kho ti lo i Pulpit a thurhnawmh cang i Pathian lung a tling ti lo. Cu pinah Bible zong a rel bal lomi, chim awk a thei lomi, mah ruahnak in bia cu mipi hmai ah an chim tikah cun zarh pi zarh khat chung mipi nih kan rak rat hnawhmi cu taklawng in kan kir lengmang cang. Nunnak ah Thlarau ti le rawl ttha a lut ti lo i kan ngam a dam ti lo. Mi kip nih Pulpit an kai tikah mipi zawng a zawtter hna i a kaitu llila tiang in a rak tuar. Fiang lo, thei lo, hmaan lo huaha in a chimmi nakin a Pastor nih zarh khar chung rem te le thlacam bu tein aa timhmi Pathian Bia tak kha ngai deuh si law a caah a let in a miakmi a si. Pulpit hi mi kip caah on cun a tthatmi nakin a chiatmi a tam deuh.

b) Pastor le zumhawktlak Bible cawnnak ngei lawng nih Pulpit kai hna seh: Mi kip nih Pulpit cung kai in Thawng Tha chim kan duhmi hi kan paw a khim lo ti a langhtertu a si. Pastor santlaih lo an langhter zong si. Pastor te nih Pathian biatak hi hmaan te le tthawng taktak in chim lengmang hna she law kan Thlarau paw a khim lai i kan hnga a ngam ko lai. Nang vun chim ve tuah a kan ti hmanh ah kan ngamh naisai ti lai lo. A thiammi Pastor pei kan ngeih ko cang cu kan ti ko lai!

Zeiruangahdah Pastor te hi Lahkhah pek an si? Pathian bia hi kan nunnak ah a herh tukmi le a biapi tukmi a si ti kan theih caah a si. Lahkhah pe hna u sih law rian dang ttuan loin Pathian bia hi rel hna she, study tuah hna she law ttha tein kan cawnpiak hna she ti ruahchannak in Lahkhak pek an si. Cu hlaan ah Pastor te lahkha pek a um bal ttung lo, Lamkaltu Paul nih a chuah pimi pei a si ko cu. Pathian bia lawngte an phuan tikah pawcawm kawlnak caan an ngei ti lo i Khrihfabu nih an cawnnak hna a si. Lahkhah lawng ei duh i daithlaan tuk le thathut tuk cu sual a si lai. Khriahfabu nih taksa in a paw an cawm ahcun Thlarau in an paw a cawm veve hrimhrim hna a hau. Pastor cheukhat cu Khrihfa upa hna biatak tein rian rinh an hmang rih cuh! Lahkhah ei maw an si?

Caah Pathian bia a chim ding kha Biatak tein aa timh a hau, riandang ttuan loin a chim ding Bible kha chun-zan in a rel a hau. Thlacam a hau. Pastor nih a rian kha a fian i ahodah ka si timi aa theih ahcun, cu Pastor lawng nih Pulpit a tlaih a ttha. Khirhfabu a dam lai i a tthangcho hrimhrim lai. Pastor le bochanawktlak Bible thiamsang nih Pulpit an kai ahcun Pulpit cungah bia tthalo chim a tlawn cang lai. Pawcawm man a hmuhnak a si caah a hmuhnak hram kha a cawm ve lai. Ti le rawl thawthaw in cawm aa zuam hna lai. Ti le rawl thaw lo huaha in cawm kan sinak a sau tuk cang i kan der dih cang.

 

 


Older news items:

Last Updated on Tuesday, 26 November 2013 12:38

Laica Kong

Interview Biahalnak

Minthang Thawng

Contact Us

Mailing Address
GLOBAL CHIN
MEDIA GROUP

215 Sand Beach Bvld,
Apt 107

Shreveport, LA 71105
USA

globalchinnews@gmail.com
_________________

Global Chin News is a non-profit news agency